Unio-leiaren opna tariffseminaret på Holmen Fjordhotell med å fokusere på likelønnskampen.
- Vi skal prioritere likelønn i dette hovudtariffoppgjeret. Eg er stolt og glad over at også dei mannsdominerte forbunda i Unio-familien stiller seg bak dette, for den store kampen i år handlar om å få til ein likelønnspott, sa Anders Folkestad. Han meinte det vil vere eit nederlag både for partane og for styresmaktene om ein ikkje får dette i mål.

Å finne ein balanse
Unio-leiaren forsikra tilhøyrarane om at Unio i oppgjeret til våren skal gjere ein jobb også for menn og kvinner i det som framleis kan kallast mannsdominert yrke.
- Det blir nok trongare økonomiske rammer i år. Dette må vi bu oss på, sa han, og minte på at det er fleire som ønsker å bruke finanskrisa til å stramme inn.
- Vi må erkjenne at det framleis er mørke skyer, og at fleire i konkurranseutsett industri er utsatt. Men det handlar om å finne ein balanse, og ikkje la nokon misbruke situasjonen til å setje likelønn på vent, sa Unio-leiaren.

Ny IA-avtale
Unio-leiaren trekte også fram sjukefråveret og ny IA-avtale i opningstalen sin.
- Vi skal forsvare sjukefråversordninga med nebb og klør, og vi skal slå ned på det der det er misbruk. Vi må berre ikkje la dette siste dominere debatten. Folkestad la til at han er glad for at statsministeren og regjeringa i det siste har vore med på å dempe dei verste utfalla mot sjukefråversordninga i media.

Sterkare innsats frå tillitsvalde
- Eg er ganske sikker på at alle partane er innstilt på at det skal bli ein ny IA-avtale. Vi må vere innstilt på å gjere ein endå sterkare innsats for eit godt arbeidsmiljø, for forebygging og tilrettelegging. Vi må mobilisere og skolere våre tilltsvalgte i dette, sa han og understreka at alle Unio-forbunda står samla bak denne forsterka strategien.